Scenkonstmuseet

Pučar e scenakoro artoskoro sumnal

Scenkonstmuseet khuvea ko teatareskoro, kjelibaskoro hem muzikakoro sumnal – anglal hem palo o kulisia – prekal o khujba ko avdivutno vakti hem ki historia. Amen mangaja te vazda tlo pučimalipe, te hojrara tlo džanipe hem te vazda o uvid baši tli lično stvoribaskiri sposobnost.

Maškar ko Stokholm

Scenkonstmuseet tano ko centralnikano Stokholm, ki zgrada Kronobageriet maškar e Dramakoro teatar ( Dramaten) hem i Thagarutni grastengiri štala ( Kungliga hovstallet) ko Ostermalm. I Kronobageriet tani i hemphurani arakhli industriakiri zgrada hem o lokalia ko teko e beršengoro funkcirindže sar furuna, podrumi bašo oružje hem sar magacini rakijake. Akava zgradakoro uspomen renovirindžape jekhe pazlivo vastea či te prilagodinelpe bašo različno, inovativno hem interaktivno muzej. Ko trin spratia isi izložbe, atelje, butikia hem jekh baro koncerteskoro – hem izložbakoro lokali.

Bare zbirke

Scenkonstmuseet isi jekh bari kolekcia paše uzo 50 000 predmetia. I kolekcia bajrardžape pobut taro 100 berš hem saikerela instrumentia, scenografiakere modelia, teatareskere kukle, kostimia hem likovno arto. O intendentia kontinuitetno kjerena buti arakhibaja, dokumentacia hem potpora istražibaske. E muzejeskiri kolekcia instrumentencar tani jekh tari i hembari ko sumnal pobut taro 6 000 instrumentia, o hemphurano taro o rano 1600- šeliberš.

Državno muzej

Scenkonstmuseet tano jekh državno muzej bašo teatar, muzika, kjelibe hem pripadinela ki organ uprava ko Zavod muzikake. O muzej phravdžape ko februari 2017.